МАЙКЛ ЖЕКСОН ҲАЛИЯМ БИРИНЧИ - 27 Октября 2011

Forbes журнали марҳум
машҳурларнинг бойлигини ҳисоб-китоб
қилиб, ўзига хос рўйхат тузди. 2009 йилда 51 ёшида ёруғ дунё билан
видолашган Майк Жексон рўйхатнинг илк поғонасини банд қилди. Поп-мусиқа қиролининг ўлимидан кейинги даромади 170 миллион долларни ташкил этди. Унинг пластинкалари ва «This Is It» ҳужжатли фильми эса 275 миллион доллар келтирди.
Иккинчи ўринда – рок-н-ролл қироли Элвис Пресли. Унинг пластинкалари туфайли меросхўрлари 55 миллион долларни қўлга киритишди.
Учинчи ўринни эса 27 миллион доллар даромад билан Мэрилин Монро эгаллаган.
2000 йилда вафот этган карикатурачи Чарльз Шульц рўйхатнинг тўртинчи поғонасида. У нақ эллик йил давомида комикслар чизган бўлиб, асарлари дунёнинг 21 тилига ўгирилган. Шульцнинг бойлиги 25 миллион долларга тенг.
Мазкур рўйхатдан жами 15 нафар марҳум машҳурлар ўрин олган. Улар орасида The Beatles гуруҳи аъзолари Жон Леннон ва Жорж Харрисон, Элизабет Тейлор ва ҳатто олим Альберт Эйнштейн ҳам бор. Рўйхат аввалроқ тузилгани учун шу йилнинг 5 октябрида ҳаётдан кўз юмган Apple компанияси асосчиси Стив Жобс унга киритилмади. Аммо келгуси йили унинг биринчи бўлиши аниқ.
Машҳурларнинг даромади вафотидан кейин ҳам ортавериши, аввало, АҚШда муаллифлик ҳуқуқи қатъий ҳимояланиши билан изоҳланади. Қолаверса, вафотидан кейин машҳурларнинг рейтинги янада кўтарилади.