Британиянинг Кембриж университети олимлари вақтини очиқ ҳавода кўпроқ ўтказадиган болаларнинг кўриш қобилияти яхшироқ бўлишини аниқлашди. Улар 10 мингдан ортиқ болаларнинг кўриш қобилиятига оид маълумотларни ўрганиб чиққач, ана шундай хулосага келишди. Маълум бўлишича, очиқ ҳавода ўтказилган бир соат болада миопия ривожланиши хавфини 2 фоизга камайтирар экан. Гап шундаки, бола ташқарида юрган пайтда узоқдаги предметларни кўришга ҳаракат қилади, қолаверса, жисмонан фаол ва қуёшнинг фойдали нурлари таъсирида бўлади. Бу омиллар нафақат кўриш қобилияти яхши сақланишига, балки қандли диабет, семизлик, витамин Д танқислиги ва бошқа кўпгина касалликларнинг олдини олишга ҳам ёрдам беради.
