Bugun seni qayta uchratdim,
Bir vaqtlar yo’qotgan sevgim.
Ishonmadim taqdir ko’yiga,
Ko’zlaringdan qidirdim sevgim.
Yo’q, yo’q, u sen emas ekansan,
Nigohingdan boqadi birov.
Kulging, yig’ing, endi boshqacha,
Dardlaringga berkingan qirov.
Yuragimda faqat bir so’roq:
Kim edim men sening nazdingda?
Mendan mardlik istab tunu-kun,
Turoldingmi o’zing lafzingda?!
Nega kelding unutganimda,
Nega bo’lding qarshimda paydo?
Nahot shu sen, qalbim o’g’risi,
Nahot senga bo’lgandim shaydo?!
Bo’ldi, meni qiynama ortiq,
O’chirganman qalbimdan isming.
Eshitmasin qulog’im so’zing,
Taralmasin, begona ising. |
