Uni sevmagandim.
Umuman... Xullas-
U bir havas edi, shunchaki havas...
Uning yodi bilan otar edi tong,
Uni o'ylap kunlar botar edi, bas...
Uni sevmagandim.
Sevmagandim, yo'q!
Muhabbat ne o'zi? Bilmasdim, asli
Yurakka tekkanda shunchaki bir o'q,
Dardimga davo, deb bilardim vaslin...
Ko'zidan tomardi ko'ksimga munglar
Ko'nglimda alamlar seli oqardi...
Uning ayvonida otganda tonglar
Mening tonglarimdan tunlar boqardi...
Uyat parda edi.
Hayo - podishoh.
G'urur ko'zlarimning artardi yoshin.
Men jim termulardim...
Ko'rmas edi, vox,
Shunday o'tib ketdi o'n to'qqiz yoshim...
Shunday o'tdik ishqsiz,
Kul ostida cho'g'.
Kunda ikki-uch bor boqar edi, bas.
Uni sevmaganman.
Sevmaganman, yo'q!
U menga shunchaki yoqar edi, bas!
Shunchaki, yig'latib ketdi yillar ham.
Armon alla aytdi, qayg'uga o'rab,
Bir so'zda aytolmay o'tdi dillar ham,
Shunchaki...
To'yida yig'ladim o'krab,
Yig'ladim, yig'ladi qaro bulutlar.
Yugurdim,
G'ururim to'sdi yo'limni.
Ko'rmoqchi edim, bir...
Oxirgi marta.
Hayo ushlap qoldi, mahkam qo'limni...
Yurak-tosh.
Muhabbat?
Kul ostida cho'g',
Yonib ulgurmayin o'chirganman, bas.
Uni sevmaganman, sevmaganman, yo'q!
U bir havas edi...
Shunchaki havas! |
