Кеча кечқурун Франция президенти оиласида қиз фарзанд туғилди. Николя Саркози турмуш ўртоғи Карла Брунини қўллаб- қувватлаш учун эрталаб Париждаги La Muette клиникасига келган. Аммо у ерда узоқ қололмаган, чунки шу куни Германияга бориб, канцлер Ангела Меркель билан музокаралар ўтказиши керак эди. Саркози оиласи чақалоқнинг расми матбуотда пайдо бўлишини умуман истамаган. Николя Саркозининг расмий вакили президентнинг шахсий ҳаётига оид ҳеч қандай баёнот берилмаслигини айтган. Шуни маълумки, чақалоққа ҳали исм қўйилганича йўқ. Н.Саркози Германиядан қайтиши биланоқ аэропортдан тўппа-тўғри клиникага бориб, қизи ва рафиқасидан хабар олган. 56 ёшли Николя Саркозининг олдинги икки трумушидан уч нафар ўғли бор, уларнинг тўнғичи 26 ёшда. 43 ёшли Карла Брунининг эса аввалги оиласидан 10 ёшли ўғли бор. Саркози италиялик Бруни билан 2007 йилда танишган ва 2008 йилда улар турмуш қуришган. Николя Саркози президентлиги даврида фарзанд кўрган Франциянинг илк давлат раҳабри бўлди.
